鴻興麵家

Open Now

Now Closed

學生未開學時第一次幫襯冇乜人，老闆娘一人開舖完全冇夥計，我叫咗碗牛筋米粉，不過唔夠牛筋，老闆娘就加咗啲牛腩比我，估唔到牛腩咁好味係我最喜歡嘅肥腩，當一餸收費$32。第二次幫襯就叫牛筋牛腩米，比上次多牛筋牛腩大大碗，牛筋好彈口又唔黐牙好易咬開，肥腩好香好肥美，一層肉一層肥膏真係好好味，亦有少少菜才做點綴，腩汁湯底好濃郁，我飲咗唔少，老闆娘認得我都係收$32，叫我做*阿妹*下次多啲幫襯，感覺好親切。😂今日第三次幫襯好多人，因為已經開學，店舖細細有一家大細又有幾個學生，仲有個阿叔淨係買牛腩拎走，好好生意。 老闆娘真係好忙，啲學生都好乖會寫紙仔落order比老闆娘，大家都會親自去拎麵，唔使老闆娘一腳踢。今次我叫雲吞牛腩米粉，好大粒雲吞，啲蝦好大粒，食完真係好飽，雙拼$42，以前喺土瓜灣返工都有幫襯過粉麵店，估唔到大角咀比土瓜灣更多美食。