第一腸粉專賣店 (Closed)

星期日，阿媽又懶得煮，於是買粥食。預先打電話落柯單，10 mins 後去攞，唔洗喺嗰度等。每人都要了一個菜乾豬骨粥，再叫了3個腸粉同2個蘿蔔糕share食。腸粉要了招牌腸、牛肉腸同豬潤腸。先講個粥，較杰，每碗都有舊大豬骨，幾咸香嘅。不過因為粥底較杰，所以越食越膩，食咗2/3已經開始飽。招牌腸，魯肉餡，偏咸，而且整體味道同腸粉唔太夾。牛肉腸，唔係免治牛肉，而係用牛肉片，雖然唔係大大片，但切開嘅時候都會比較難；味道ok。豬潤腸，自己都係覺得豬潤同腸粉最夾，豬潤爽口，而且還有薑絲。蒸蘿蔔糕，大大件。係我鍾意食嘅蘿蔔糕，因為真係食到蘿蔔絲。真材實料，唔係淨得粉，有大大條嘅蘿蔔絲，也有少許蝦米。