Pompompurin Cafe (Closed)

首先我想講，同行嘅人全部都唔係布甸狗粉絲，只不過見佢8月12號結束營業，就去朝聖一下。+++點估到排隊排咗個半鐘+++如果唔係小朋友好想嚟食，我應該走咗。我哋3個人叫咗兩杯特飲，分別係焦糖牛奶同芒果梳打，再加杯熱咖啡，焦糖牛奶要撈均先好飲，因為焦糖坐晒底，會好甜。芒果梳打同貢茶買果啲無兩樣，$69算係貴。我哋嗌咗一個俄羅斯燉牛肉飯同一個卡邦尼意粉，先講個意粉先，普通過食茶記。嗱，你實話睇主題為主，食物其次，但對於吃貨嚟講，食物係永遠的第一位！個俄羅斯燉牛肉飯就為呢一餐飯挽回唔少分數。牛肉係肉碎，配埋個汁好惹味，小朋友第一時間食咗一大半。甜品叫咗雪糕新地同拿破侖，嗯……有啲後悔唔試吓個tiramisu 。可能都開咗業一段時間，店內嘅裝飾都有些少舊，個女廁仲壞埋要用男廁。總括嚟講，即使佢唔結業，我都唔會回頭。