Jimmy's Kitchen (Moved) New Location

老闆為左多謝員工，帶左我去呢間英式老誌號，仲話結業前要去一次。我問到其中一個年輕男侍應，有咩好食，佢二話不說係洋蔥湯同豬手。洋蔥湯大家真係要必試，因為出面既洋蔥湯都好稀，呢到既洋蔥湯絕對落足料，上台係勁熱，聞落又香，飲一啖湯好清甜，之後加上湯入邊既濃濃芝士味。哇，果下好似上左天堂。如果冬天飲仲得了！？之後到前菜，我叫左個法式焗田螺。以為個田螺係最好味，但我覺得可以落多小小鹽，反而最出色係個薯蓉。好香好creamy，食到停唔到口。再黎個炸豬手，呢個真係係我人生活左20幾年，最好食既一次，不論賣相同味道真係一流。我食開既都係得個脆同咸，但佢可以做到脆、咸、香同爆汁。個侍應哥哥無介紹錯，好食過牛扒。好既牛扒成日食，但咁好食又唔膩既豬手又好少見。牛既面頰肉幾軟熟幾夠味，都okay..但唔會好驚艷。至於個湯牛肉太淡，唔太建議大家點，除非你減肥又想健康。甜品就有布丁面包，無咩特別。再叫左個，火焰雪山蛋糕，個形好靚，但好甜，如果三四個人食會岩岩好，雪糕出色過d cream。