Masala Hut & Cafe (Closed)

呢間印度餐廳幾抵食，星期日中午去食lunch buffet $130，有多種前菜沙律、咖喱、印度薄餅、印度特色食物任食，仲包一杯嘢飲添。首先我梗係食一輪沙律前菜，有一個脆米波波可以裝一啲薯仔沙律入出再倒入一啲特色醬汁，幾有特色幾開胃。食咗一陣好快店員就送上naan同埋一個卷餅。卷餅係即場整嘅，裏面有啲好似咖喱薯仔嘅餡，餅皮鹹鹹地有啲胡椒香，幾好食。naan就緊係用嚟點咖喱汁食啦，出面最少有5/6款咖喱，各有特色。其中有一款叫Rogan Josh，羊肉用creamy嘅蕃茄咖喱汁炆煮得好入味，肉質柔軟，肉味香濃，用naan點汁食好正。另外仲有雞肉嘅chicken tikka同埋kadhai chicken，呢兩款咖喱辣度都啱啱好，香濃惹味。不得不提呢度嘅炸魚幾唔錯，炸粉薄薄，香口脆脆嘅外層包住大大件嫩嫩魚肉，配上各種咖喱汁食又係另一種滋味。總括來講，呢個自助午餐可以試到唔同嘅特色印度咖喱，味道亦都唔錯，性價比幾高。最後慢慢飲埋一杯凍飲，食咗滿足嘅一餐。