巴打麻辣燙 (Closed)

一向鍾意食辣野嘅我，早就想試下呢間麻辣燙！今日嘅lunch 算比較遲，我黎嘅時候係2:30啦，所以店內唔算多人。呢間餐廳算係裝修得唔錯、坐得又幾舒服下。見到裏邊有一個位放咗好多食材，原來呢度係自助嘅。啲食材一包包一串串咁放好晒，等你可以好似自助餐咁自己揀。選擇都算好多下。菜、肉、丸、內臟、粉面都有，目測都有起碼4-50款。揀好之後攞去比服務員俾錢，同埋講要幾辣。因為我未試過呢間唔知佢會唔會超級辣，所以就叫咗小辣姐。俾咗錢坐低後大約5至10分鐘左右就上菜啦！由於個午餐比較遲，所以非常之肚餓我叫咗六個餸！如果冇咁肚餓嘅可以叫少啲餸架，因為份量都幾足。雖然小辣但係我覺得佢都算幾辣。佢唔算好麻但係個辣係好香嘅，入口好香又唔會有後勁嘅嗰種辣。如果鍾意食辣嘅朋友可以試吓中辣或者大辣應該好刺激下 ：）六個餸$52，價錢來講算係中上啦話晒都叫做有啲裝修坐得舒服，性價比算係OK啦。