至尊滿屋日本料理 (Closed)

一向鍾意食放題嘅我， 今次就揀咗旺角瓊華中心的至尊滿屋日本料理， 貪佢方便就腳， 位於商鋪林立嘅街道附近， 行街時順便訂枱就可以上嚟，非常方便。坐低冇耐，待應自動奉上一盤好靚好精緻的刺身， 唔洗自己揀，招呼一流抵讚。 刺身多款而且勁新鮮，我最鍾意個甜蝦， 鮮甜無比， 食完唔夠喉再點多一轉，正。壽司方面，我哋只係點咗法式芥末象拔蚌壽司同黑松露油甘魚壽司， 呢兩款較小見， 象拔蚌鮮味得嚟好爽口， 帶淡淡嘅甜味。 油甘魚係我其中一款喜歡吃嘅刺身， 配上香氣四溢嘅黑松露， 味道夾得來唔錯。幾鍾意呢度嘅熱食同串燒， 鹽燒雞中翼外皮金黃香脆， 非常香口。 串燒牛舌口感唔錯， 咬落去有嚼勁，爽口惹味。天婦羅炸得幾靚，金黃色外皮鬆脆可口不油膩，蘸上天婦羅汁好好味。吉品飽汁燴花膠盛宴，味道濃郁， 花膠炆得好淋好入味，推介。芝麻雞翼上枱時仲熱辣辣， 好香好脆， 唔夠喉再encore多一次。燒翠肉瓜清甜爽脆，平時唔覺得好食，但烤完又真係香口好食d。而燒菠蘿仲正，又甜又多汁，咬落仲好juicy添。最後仲有Haagen-Dazs限定版芝士麻薯雪糕食，呢餐真係超級滿足呀。