BEL CIBO Seafood Bar & Restaurant (Closed)

小弟有位大學師姐前年畢業之後，今年終於考到魚翅公司嘅空姐啦，為咗同佢慶祝，我特登帶佢去尖沙咀食番餐好嘅！呢間餐廳位於尖沙嘴厚福街H8 12樓，叫Bel Cibo，係一間fusion西餐廳。我哋食咗個是日二人晚餐，頭盤有三個，第一個係鮮果釀酥盒伴煙三文魚花配香芒汁。個酥盒好脆，上面生果又多，煙三文魚又新鮮，配埋個芒果汁，好夾好fresh！第二個頭盤係香煎法國鵝肝伴焦糖菠蘿，鵝肝脆口配埋個焦糖菠蘿，食落唔會好膩。第三個頭盤好犀利呀，係秘製鮮凍鮑魚，鮑魚唔韌又鮮甜，真係我食過最好食嘅鮑魚呀！是日餐湯：忌廉海鮮湯食完頭盤就到主食啦，呢個主食都唔少野㗎，係海膽黑松露野菌意大利飯。意大利飯上面d海膽又多又大又新鮮，好吸引；加上個意大利飯又整到啱啱好，真係令我好難忘！主菜呢就可以四揀二，有美國安格斯肉眼扒、美國有骨豬鞍扒、刁草烤焗挪威鮮三文魚柳同香煎銀鱈魚柳。我哋就分別叫咗肉眼扒同銀鱈魚柳，肉眼扒又大塊，又唔韌，配埋岩鹽同燒汁，一流！銀鱈魚柳而家好高級㗎，好少地方有得食，而呢度呢就大大件，好足料，配埋特製醬汁，大家一定要試下！是日甜品～今次好滿足呀！