大川滬 (Closed)

喺香港食中國菜系要好食已經難，仲要係💛嘅就更難！估唔到喺土瓜灣竟然有間唔錯嘅上海菜！餐牌上有好多未見過嘅菜式，真係好多都好想試！經過一番掙扎後決定試下樟茶鴨，以前慈禧太后好鍾意食鴨，就有大廚用樟樹葉同茶葉煙熏鴨成依道料理。食落其實又幾似西方嘅煙鴨胸，不過感覺比較乾身同埋外皮係炸過所以會更香脆。隨碟仲會附上甜醬同白包，鴨嘅鹹香配上甜醬中和都別有一番風味。類似饅頭嘅包就可以同鴨一齊食，但就咁食都絕不失禮，非常香甜有彈性不知不覺就清哂！而佢哋嘅小籠包就偏細粒，不過皮真係夠薄而且唔易穿，咬開肉餡多汁噴到周圍都係，高汁！鹹菜津白油豆腐味道其實同平時嘅上湯津白好似，而且係意想不到咁大兜，應該係四至五人份量添！入面有煮到好淋嘅津白、不太鹹嘅鹹菜、吸哂汁嘅油豆腐同粉絲，最重要係飲哂成煲湯都唔會口渴，相信係無味精全靠鹹菜提味！食完咁多嘢其實都飽，不過最尾都係想食埋個甜品收尾。即炸嘅高力豆沙一上枱已經聞到超香蛋白味，加上入面唔會過甜嘅超軟豆沙很不錯，豆沙再多一點就更好啦！最後值得一提係佢哋嘅蕎麥胚芽茶非常解膩，店員阿姐阿哥不時主動加茶真係一杯接一杯無停！必定會再encore大川滬！