張記餐廳

Open Now

Now Closed

四圍搵食！總有意想不到嘅驚喜！呢間路口檔外觀一般，一幢村屋地下做餐廳，前面空地放有摺枱摺櫈！好簡單！但做嘢去到都無得揀！坐在外面露天帳篷位置，方便睇車！（幸好天氣而家秋涼，都唔熱）餐廳食物都係港式茶餐廳食物，不過只有散叫，無早餐叫！叫個「雲吞紅腸麵」加熱檸茶（$32）價錢唔平，等一陣熱檸茶上先，玻璃杯，茶底香濃唔澀，夠熱，茶餐廳水準，食物之後上，一個膠碗裝住，紅腸好大塊，煎得香脆！味道咸香，雲吞細細粒，一啖一粒，皮薄夠味，裡面有豬肉同蝦仁，蝦肉爽口，豬肉有肉汁，好味，麵係出前一丁（因為見到店外放了好多出前一丁包裝袋，我係無加錢叫的）不過煮得淋咗啲（個人口味）如果可以硬少許就好喇！湯當然係出前一丁麻油味，可以濃番少許！店員有禮，不過好似唔熟，落單要講多次，不過有覆單，笑容搭夠，亦會出來幫我們埋單，唔使個客人行入去，地點在公共廁所旁，變了餐廳廁所，而家公廁水準好，雖然無職員長駐，都好乾淨！環境就一般，始終比公廁同垃圾站好近！