The Point Kitchen (奧海城二期) (Closed)

疫情下，好耐冇約老友逛街，見疫情減退，終於可以放心約朋友去行吓街，食吓嘢。由於唔想去人流太旺嘅商場，所以今日同朋友去咗奧海城逛街。行到攰攰哋，見有間餐廳面積頗大，座位寬敞舒適，午餐價錢幾抵，就入去試下。我哋叫咗兩個午餐，之後發現有我最鍾意嘅白酒煮蜆，所以忍唔住加多一個白酒炒大蜆。香蒜辣椒白酒炒大蜆 ～ 果然冇令我失望，白蜆大大隻，無砂，肉好厚，加上好香嘅蒜片同陣陣嘅白酒味，辣辣地，好開胃，配埋迷迭香多士點汁食，一絕。跟住午餐到，今日餐湯係南瓜湯，非常creamy，好有南瓜味。麵豉醬烤三文魚 ～ 賣相唔錯，配有牛油果薯仔沙律，比較特別，青露筍好鮮嫩，冇渣。三文魚加上麵豉醬烤，外脆內嫩，魚肉嫩滑，好juicy，帶少少麵豉醬香味，有啲日本菜feel。燒烤醬豬肋骨 ～ 配檸檬乳酪椰菜沙律及薯條， 豬肋骨 size 都好大，配上特製沙律菜食，比較清爽，冇咁油膩。食完lunch，嘆番杯 cappuccino，悠悠閒閒同朋友傾下偈，好relax。呢間餐廳雖然係我第一次嚟，但畀我嘅印象好好，環境好舒適，食物質素唔錯，下次有機會會再來試其他食物。