金妹記大排檔 (Closed)

早排同朋友喺銅鑼灣行完街，就去咗呢間新裝修無耐嘅商場搵食。原來係旺角嘅金妹大排檔，而家喺呢個商場開咗分店，裝修都幾華麗，我哋一行幾人就入咗去試吓。一坐低朋友即刻話喺呢度食嘢，一定要飲啤酒，我開頭仲唔係好明佢嘅意思。原來因為喺呢度飲啤酒，會配上佢哋招牌碗，第一次用碗飲啤酒，感覺好新鮮好特別。份量都好多，哈哈！經店員介紹，佢哋提議我試下乳鴿，所以我哋就叫咗一隻食下。乳鴿上枱嗰時仲熱辣辣，皮脆肉嫩，質素比想像中好。另外就叫咗一碟大排檔必食嘅薯仔牛柳，喺室內食薯仔牛柳粒感覺有啲怪怪地，雖然份量唔太多，但賣相都幾好。黑椒牛樓粒嘅份量比我想像中多，而且肉質都幾嫩，食落唔會好鞋，而我最愛嘅薯仔都揸到外脆內軟，滿意！慣咗每一次晚飯都要有菜落肚，補充一下纖維，所以就叫左呢個南乳齋菜煲。菜嘅種類都算多，另外仲會有茄子枝竹等等，南乳汁有點兒少，但都尚算入味。餐廳嘅冷氣系統好大，所以食到最後都有啲凍，第一次係室內食大排檔，平時越食越熱，今次反而越食越凍。雖然好似失去左大排檔嘅風味，但呢度就乾淨好多，所以夏天嚟呢度食都係幾唔錯嘅選擇。