臺茶•薈 (Closed)

短期內都無得去旅行，今晚同朋友去食台灣野過下口癮。一入到去以為店鋪細細，原來仲有上層，環境好舒服寬敞。餐牌食物唔貴，可以試多幾樣。如果有埋食物圖片會更吸引。叫左多款少食，依個滷水豬耳好入味同夠軟，味道偏甜，同潮州嗰種唔同。雲耳青瓜有驚喜，少少辣，個汁好醒胃同惹味，好快清碟！！仲有我非常喜愛嘅口水雞，佢個醬係自製嘅，杰杰地甜甜地，無麻辣嘅感覺，雖然唔係又麻又辣咁過癮，但份量都好足，啖啖肉。紅油抄手係為食而嗌嘅。我個人覺得個醬汁係同口水雞嗰個一樣，如果鐘意食辣就唔使叫。由於食左太多小食嘅關係，只揀一款主菜，就揀左一次過可以食哂咁多款材料嘅臺茶薈炒米粉。可以一次過食到各台式丸類，手撕雞，肉燥，肉鬆等，又足料又大碟。米粉嘅質地軟滑，加埋勁多配料，好味！唯一美中不足嘅係咁岩嗰日芋圓未番貨，食唔到依款點品。只好叫左珍珠奶茶同豆沙窩餅滿足甜品慾，珍珠奶茶跟主食加$5就飲到。抵呀。豆沙窩餅就正常水準，外皮又熱又脆，豆沙不會太甜，滿意。朋友唔飲得凍野。揀左油豆腐肉碎粉絲湯，熱辣椒，落左香芹，更添香氣，如果肉碎少啲肥肉就好啦