早安越南 (Closed)

同女朋友拍完拖拖搭船去咗黃埔，太肚餓嘅關係一落船馬上周圍搵餐廳，上到去黃埔美食坊人山人海。難得見到呢間餐廳仲有座位就馬上walk-in.好耐都冇食越南泰國嘢，一時之間都揀唔到食咩好，餐牌嘅選擇十分多。不過價錢都算比想像中便宜，而且裝修好有特色，座位舒服，服務員態度都好好。諗左一陣就先點4串串燒，二豬二牛。太肚餓嘅關係，等唔切相機食先，豬肉串燒好香口，食得出係新鮮燒起仲要脆邊，好食過之前九龍城食嘅唔少餐廳。牛肉有啲難咬，不過醬汁搭救一樣好食。另外仲叫咗碟菠蘿海鮮炒飯同埋鹹魚炒椰菜苗，份量都比想像中大，足料！炒飯炒得好乾身，有機會都想試埋其他炒飯。最令我驚喜嘅係佢哋嘅沙冰，我哋點左一杯奇異果一杯香蕉沙冰。沙冰磨得非常幼細，口感一流，而且生果味道非常突出，係用新鮮生果整，好有誠意，價錢又抵，值得大家一試。