大冒險家餐廳

Open Now

Now Closed

以往入迪士尼如果食午飯通常都係去皇室宴會廳食，因為個到有比較多唔同野食揀。今次同屋企人去迪士尼，決定試下呢間大冒險家餐廳，因為佢有主菜加半自助餐，自助餐來講又唔算好貴，所以入來試下。我地無訂檯，亦都無在指定時間1:30入去，雖然當日星期日，我地大約2點先去到，但當時唔多客，入去見到坐得幾鬆動。我地坐係俄羅斯區，當時個區得四圍檯有人。我地覺得坐得幾舒服，終於唔洗係皇室宴會廳同人逼、爭等位，可以清靜享受一頓午餐，絕對係呢間餐廳的一個賣點。坐低叫左每人一個主菜之後，就出去拿頭盤同沙律。三文魚一般般，有個凍蝦幾唔錯，炸物亦一般般，不過第一次試都無失望。另外可以參觀其他區域，埃及、中國、印度。主菜其一叫左牛油雞配印度香飯，我地食落一啲都唔覺辣，雞既份量好多，飯亦算香口。主菜其二叫左煎鱸魚薯蓉，個魚質地唔錯，味道一般，薯蓉就幾好味，整體我地滿意。到自助拿甜品，全部都幾好食，兩樣最好食係綠茶味甜品同柚子味甜品。當日天氣炎熱，所以大家都好口渴，呢間餐廳有香片茶、蘋果汁、港式奶茶、清水任飲（仲有其他，我地無飲曬），所以大熱天時來呢間歎冷氣食午飯係唔錯既選擇。整體而言，物有所值。下次來迪士尼都會考慮來呢間