龍門冰室 (Closed)

久仰龍門冰室嘅大名，今日終於有機會去試一試。係附近放左工，咁啱見到門口無平時嘅長龍就入去試試。餐廳環境簡潔，以黑白磚做地板，懷舊又摩登嘅香港冰室風格，坐位舒服。而且佢menu選擇非常多，有唔同嘅配搭，有選擇困難症嘅我睇左勁耐。最後我叫咗個3.6特濃牛乳芝士玉子燒套餐，玉子燒就揀咗咸牛肉。先講主角玉子燒，用3.6特濃牛乳煎嘅玉子燒非常香滑，好少茶記會用3.6牛乳，味道好好。而且一切開就見到好多咸牛肉，落足料，咸咸地好香口而且一啲唔漏，唔錯唔錯。炸菜肉線米啲米粉爽口，同平時啲茶記好唔同，炸菜肉絲又係一啲都唔手軟，成碗鋪滿晒，每啖都食到啲餸。花生醬多士，超厚，表面煎到香脆，花生醬搽到滿，正！成個套餐嘅份量非常充足，一碗粉麵，一個玉子燒，一個多士，跟埋杯餐飲，總共都係48蚊咋，抵食！😋 想食下港式茶記風味，同支持良心餐廳，一定要嚟龍門啦。