35座車仔麵 (Closed)

一向唔太鍾意食車仔麵，因為成日都食我唔飽😅，所以 35 座車仔麵雖然非常近我屋企，亦都非常出名，但係一路都的唔起心肝去幫襯。直至舊年年底佢畀人惡意破壞，同仇敵愾，於是走去作出懲罰。我知唔少人都讚呢度嘅豬大腸同南乳豬手好食，可惜我兩樣嘢都唔好，加上亦唔鍾意食豬紅，牛筋等傳統車仔麵餸菜，所以只揀咗魚皮餃，五香牛肚，台式風味腸，鮮蝦腐皮卷等 “小朋友食物”，本來仲想叫蠔皇小花菇，秘製辣魷魚兩樣名物，但係落 order 時已經賣晒。四樣餸中最正係五香牛肚，非常入味，又有咬口，份量亦算多；其餘三樣餸都係現成來貨，味道不俗，加埋湯底入面嘅腩汁，成碗麵質素其實頗高。小店另一名物係張收據，每張都印上振奮人心嘅字句，例如 “希望黑暗嘅盡頭會是光明”，，“盼自由歸於這裡”，“ 同行兒女為正義 時代革命”等，算是對食客一點心靈的慰藉。