川府宴 (Closed)

突然想食川菜，就約朋友搵左附近川府宴食。 餐廳幾近地鐵十分方便，雖然唔係好大間，但從窗外望住高樓大廈景，加上精心裝潢設計氣氛好relaxing 。我點左蒜泥白肉丶涼伴醺蹄雞件丶酸菜魚及川式炒莴笋。涼伴醺蹄雞件酒味好濃，雞脾肉有精心處理過，除左去骨之外更把皮下脂肪移除左，食落啖啖肉非常開胃。川式炒莴笋材料份量非常足夠，好多雲耳，莴笋好爽口。 大部份川菜味道較都濃，但這碟菜就調返轉，味道非常清新，更可以俾味覺休息一下，猶如沙漠裏嘅一片綠洲。蒜泥白肉蒜泥好濃味，不過有清爽嘅青瓜夾住一齊食，兩種食材互相撞擊下，味道又昇華到另一個層次，再加上爽口白肉，口感顯得有層次。酸菜魚今晚嘅重頭菜酸菜魚，非常足料。 除左石班魚塊，仲有芽菜丶粉皮丶酸蘿蔔丶雲耳丶青椒丶紅椒，本來以為會好酸好辣，不過係恰到好處。 魚肉好爽口，湯汁令人停唔到口飲左三四碗，可惜真係太大份，兩個人食唔曬 更打包回家。Overall 幾滿意，餐廳也有好多其它菜式，吃完仲想食再嚟多次食。 唔係好食得嘅辣朋友都可以嚟試，佢地可以幫你調整辣度。