茶木‧台式休閒餐廳 (Closed)

今日相約朋友慶祝生日，本想食個high tea，但係適逢復活節假期必定無位，所以就提議試試極具人氣既茶木喇!  因朋友要從觀塘去尖沙咀需時，所以我先去攞飛等位，我2:30到達攞飛，只係等12張，唔算誇張，所以一路等朋友黎一路等位~等左20分鐘左右就到我，但要人齊先入得，朋友又未到所以要繼續等! 終於等到朋友到喇，order完之後好快就有飲品送到~飲品方面揀左綜合水果茶、熱水果花茶，橙汁底既綜合水果茶，雖然名字係茶，但唔覺有茶味，只係有橙汁味，當橙汁飲的話味道不錯~而熱水果花茶，我無飲到，據朋友話茶裡無水果味，加入糖槳先有味道，可要求再加茶。食物方面叫左紅燒牛肉麵同草莓香草蜜糖磚塊。紅燒牛肉麵 - 先飲一啖湯，超級香濃! 牛肉十分稔而且唔痴牙，有種入口即溶既感覺! 紅蘿蔔同白蘿蔔好入味，麵條亦算煙靭彈牙。絕對是驚喜之作! 另外，當然要試試名物藍莓香草蜜糖磚塊，雪糕配上塗上蜜糖既多士，有d硬，下層多士因無蜜糖，比較乾，要點雪糕先鬆軟返。份量算大，適合3-4人食，我地兩個女仔差唔多食淨半個，不過味道尚算不錯~ 總括而言，食物味道比飲品好，與咖啡弄比，應該會係茶木更勝一籌! 下次仲會繼續黎~