職人食事 (Moved) New Location

身處駱駝漆大廈，突然想食魚生飯，屋企人話去呢間試吓。喺門口睇餐牌圖片覺得都唔錯，就決定試吓。我自己就點咗個燒茄子同推介嘅刺身魚生飯。燒茄子無乜味，但尚算可以。但望住碗實體飯，真係勁失望。油甘、魷魚、八爪魚及帶子各一，呢幾樣除魷魚覺得好味外，其他都好一般。另外差嘅有兩片毫無鮮味嘅三文魚、兩條硬屈屈嘅蟹柳，未試過食丼飯隻蝦係咁細隻。醋飯亦唔夠味及黏。最離譜嘅係⋯⋯個丼飯幅圖係會有兩片海膽，個實物居然夠膽死只俾一粒。係一粒，唔係一片！呢個丼飯仲差過去普通超市買嘅丼飯，絶對物非所值。雖然知道實物同相片係會有出入，但都唔好咁離譜吖。😡😡😡😡另外，餐具及各茶水係自助形式。原本係好方便嘅。不過個人認為疫情下，啲餐具如果唔係獨立包裝好嘅，最好都係收返埋好啲。眼見幾個人出嚟攞餐具左揀右揀又無帶口罩，呢個時期就唔多好喇。