鮮芋仙 (Closed)

鮮芋仙係我至愛嘅芋圓專門店之一，去到日本都要食佢，反而喺香港開左，今次先係第二次食，之前每次想食，都係因為見到門口人龍而卻步。今日做完嘢已經過左午飯時間，天氣又翳焗，等左一陣車已覺汗係咁流，突然諗起附近就有間鮮芋仙，呢個時間又唔係糖水黃金時間，應該唔多人，去到見到真係無人，勁開心，一於芋圓當飯食，加埋碎冰幫身體降溫。🍧招牌仙草冰沙 $45第一啖擺入口，透心涼嘅感覺，立即舒服晒，夏天食呢個，簡直仙丹一樣。仙草冰沙夾雜著仙草嘅香甜，配埋花奶一齊食又香又滑。👍基本上芋圓唔洗點介紹，呢度嘅芋圓口感真係無得輸，有蕃薯/芋頭香之餘，口感特別煙韌，唔會有咬到粉團嘅感覺，Q彈有嚼勁。店舖光潔簡約，店員又有禮貌，只要避開糖水時間，其實真係可以好舒服咁嘆呢碗甜品，細食嘅女士食晒一碗都真係有飽肚嘅感覺，當正餐咁食，美味、消暑、仲可以避開人潮。