松記糖水店

Open Now

Now Closed

天氣凍，突然好想食芋頭西米露，於是去路德圍幾間糖水舖碰碰運氣，最後發現只得松記有呢個糖水，一向對松記出品無好感，但喺無選擇而又好想食既情況下，唯有畀多次機會佢，可惜，經過今次，相信以後唔會再幫襯！如此低質既地道糖水真係第一次見！西米小，而且好肯定係糖水煮西米，然後百搭用。椰汁似係淡奶開出黎，椰味唔濃，反而奶味好重，超怪！最後，而且係最衰既一樣，就係糖水入面既芋頭竟然係炸過既，真係聞所未聞，到底係老闆尋晚打邊爐用剩定點？我明白芋頭會溶，但呢個糖水，係應該煮到芋頭同西米都有少少溶，先不至於成碗嘢稀流流。松記糖水款式係多，可惜，為咗配料可以一物多用，不惜犧牲質素，真心覺得不必再回頭！