北海道爐端燒 (Closed)

好中意去日式居酒屋，可以同朋友傾計飲野，仲要通常啲食物都好好味。亞士厘道有好多樓上舖，今次走左上去北海道爐端燒。Menu第一頁就係不同嘅浜燒海鮮，好吸引呀！叫左北海道什菇帆立貝牛油燒，一人一大隻。連埋北海道蟹蓋蟹肉蟹膏燒一齊上，店員都好細心咁同我地講解點樣整。蟹肉蟹膏燒本身熟嘅，將鵪春蛋撈勻，燒三四分鐘就得。蟹肉好新鮮，燒香咗更加美味。帆立貝就要燒得耐少少，燒完都仲係大大粒，又係好新鮮，好好味。第二樣十分矚目嘅野食係煙肉芝士奶油意大利麵。想試咗呢種每一條麵條都沾滿芝士嘅意粉好耐，即刻叫左一碟，仲加左三文魚籽。原來巨型芝士輪正正放係我地附近，睇住店員迅速將意粉撈匀，上枱仲嗅到濃濃芝士味。意粉除左有芝士、煙肉，仲有不少蝦，再加埋粒粒三文魚籽，口感更佳。建議大家叫芝士意粉的話要即刻食，唔係凍咗就會凝固變成一舊舊。食咁多肉類，都要食下菜嘅。叫左個黑芝麻煙肉沙律，無諗過係黑芝麻醬，又幾特別，沙律菜同蕃茄青瓜都十分清新。黎到居酒屋又點可以無燒物，當然要叫香噴噴嘅明太子雞翼。脹卜卜嘅雞翼入面填滿餡料，外樣皮燒得香脆。明太子又唔會太濃味，整得剛剛好。