新記芝士麵 (Closed)

上星期同朋友去尖沙咀行街，佢知我係芝士迷，特登帶左我去試新記既芝士撈麵。不過餐廳既位置有啲隱蔽，係一個賣攝影器材既小商場入面，如果唔係朋友帶路我應該唔會發現到呢間餐廳。一行到餐廳門口就會見到佢既玻璃窗上貼滿哂唔同明星黎食野既相片，同埋一啲雜誌報紙既報導。餐廳入面既裝修同一般茶餐廳無咩分別，普普通通。我地兩個都叫左雞翼芝士撈麵（$42），唔包野飲，價錢比一般既貴少少，份量對女仔黎講岩岩好，男仔可能會唔夠食。可能你會覺得碗麵既賣相並唔吸引，但係食落真係好味到會上癮！平時食芝士撈麵最怕就係食到一半就會覺得好漏食唔落，但係呢度既芝士撈麵好神奇地係一啲都唔漏感覺唔肥膩。啲芝士醬食落口好creamy味道岩岩好，食到最尾個碗底又唔會油淋淋有好多牛油係度，雖然啲麵只係普通既公仔麵，但配合埋啲芝士就會令人一啖一啖係咁食，完全停唔到口。雞翼都幾入味，好match到個芝士麵。最重點係呢度啲芝士醬汁既份量岩岩好，可以令每條麵上都充滿住香濃既芝士味，絕對係加分位！呢間係我絕對會想去多幾次既餐廳，因為個芝士撈麵實在太令人回味。