茶芝味 (Closed)

食完手卷飽飽地，但打算飲埋野先離開，揀左茶芝味。呢間飲品店喺葵廣都一段時間，除左新開嘅時候有啲人潮，其實我每次經過客人都唔多。唔知係咪因為位置問題啦，位於一樓，唔算喺食店集中位，獨成一角店面喺格仔店之間，唔係好突出，路痴搵左一陣子先見到，只有一位店員，如果黎到唔見人，可能佢喺裡面沖緊茶啊，耐心等一陣。餐牌供應齋茶、芝士現泡茶、宇治抹茶、奶茶、水果茶、益力多飲品等，定價$20-30，芝士茶飲品可以加錢配搭oero/紅豆。驟眼睇價錢，感覺上就比樓上嘅茶飲店定價高出一點。本來店家嘅招牌應該係芝士宇治抹茶，不過個人都係比較喜歡黑茶或者綠茶類，所以選擇左普洱。茶芝味普洱 $26芝士層厚身，暫時喺香港飲過比較厚得黎稠身，質地比較接近喜茶。第一口飲落幾有驚喜，雖然味道唔似喜茶，但都有陣芝士鹹香。可惜飲多幾口，就開始變淡。茶底因為點嘅係普洱，預期會比較濃啲，實際就比較弱啲，後續會有種普洱淡淡苦澀。普洱底我喺國內嘅台蓋試過，茶底真係好濃郁普洱茶味。以芝士茶而論，已經算係香港比較出色的。如果再黎葵廣，係屬於會回訪嘅茶飲店。