唐宮小聚 (荃新天地) (Closed)

好多試過「唐宮」嘅朋友都覺得佢嘅點心拋開傳統，花款多又得意。要講佢係一間茶樓，唔係，話係餐廳，又唔完全係，不過佢真係集結咗餐廳同茶樓於一身！喺呢度完全搵唔到一般茶樓嘅傳統點心，反而係一啲創新嘅小點。好似點心拼盤「點來聚聚」（＄６９）就有墨魚汁餃、芋蓉流沙包、柚子蝦餃、奶香糕同紅菜頭餃，認真中西合壁。炒蝦腸粉（＄７９）係以XO醬、豉油，用原隻鮮蝦炒豬腸粉，爽口Ｑ彈。主打嘅白玉王鴿（＄３３／一隻）皮脆肉嫩，最啱送店內推出嘅梅酒（飲茶定飲酒？）。黑金流沙（＄４９）其實係奶黃包，只不過外表係黑色，味道同傳統嘅大同小異，怕黑人士可以唔嗌。非常山竹（＄３９）外表睇似紫色版煎堆，實際上內餡係龍蝦汁蟹肉，味道有趣。如果大家想食埋晚飯，店內都有一啲創新小菜，好似燉烏雞湯、火焰菠蘿牛肉、荷葉飯等，都係唔錯嘅選擇。