潮州人 (Moved) New Location

見到報紙報道，太子有間專食花膠米線粉嘅黃店，趁今晚早食飯專程去試吓，佢店舖好細，坐到三四台客only，店舖牆上大大句「我地真係好撚中意香港」今日我有三個人一齊食，我哋就叫咗個二人餐再另外散叫一個面，二人餐除咗包兩個粉之外仲有一碟菜同埋兩支嘢飲。佢最招牌出名就係花膠湯米粉，二人餐裏面其中一個當然會叫呢一個，佢嘅湯係用雞湯，送米粉一流，花膠煮得好入味彈牙，但係略嫌件數少咗啲。另一個就揀咗廣島蠔湯米粉，廣島蠔好肥美，一咬落去蠔汁就會湧出嚟整個口腔都係蠔嘅鮮味。另外仲散叫咗個蠔油花膠撈米粉，幾特別撈米粉唔多有得食。見到佢寫住有推薦額外叫咗一個清酒煮大蜆，呢個好好食，夠大隻夠甜，如果一個人嚟食，可以直接叫佢個清酒大蜆湯米粉。