開飯主義

Open Now

Now Closed

大埔墟食lunch, 行過呢間餐廳，見有好多選擇，入去試吓。餐牌密密麻麻嘅項目，港式、西式、日式、大碗飯、芝士溶岩類別等，坐底揀緊食咩嘅時候除咗睇午餐之外，我都順便睇埋下午茶有咩食，諗住下次試吓，嗰時侍應見到我睇下午茶Menu，就同我講：你唔好睇呢啲啦，依家呢個時間冇得叫㗎！”。我心諗……依家lunch時段，我梗係知冇下午茶啦，只係想睇吓你哋下午茶有咩食啫。我冇理佢，過咗1分鐘到又有另一位侍應同我講，”依家冇下午茶㗎, 睇其他嘅嘢啦！”, 妖……..李露媚呀⋯⋯睇吓咋，我冇話呢刻要叫下午茶，而家lunch時間我睇定啫⋯⋯係咪睇吓都唔得呀！好喇揀午餐，熱到冇乜胃口，但始終要食啲嘢，咁就揀咗”花膠無骨雞湯泡飯”, 希望有淡好少少嘅湯入口。上枱，份量正常，湯嘅顏色就夠喇，味道比例湯好少少，鹹味多個雞湯嘅味。雞件·有六件已去骨唔使吐骨方便👍🏻，雞肉都嫩嘅，不過就冇乜雞味；花膠·大約有六件，size一嚿一啖細細嚿，都食到有花膠嘅味，不過帶有腥味, 不過呢個價錢，話晒都有花膠食，唔要求太高喇。最後以一杯正常嘅凍檸茶，完成當日嘅午餐。