就是偏偏喜歡你

Open Now

Now Closed

同朋友聚聚就當然要搵個好地方，一間花花少女心嘅Café就當然係不二之選，所以就嚟到花花世界嘅 就是偏偏喜歡你 食個Lunch。依間絕對係打卡-able Café，基本上每個位置都好啱打卡，除左周圍佈置到成個花海之外，仲有鳥籠座位選擇。最特別就係店內仲有兩隻兔子陪伴，乖乖兔子仲可以隨便摸摸，太可愛了。養生朋友就叫左一份Café主打嘅「低卡輕盈午餐配營養奶昔」，唔好以為輕盈好少嘢，但食落都真係好飽肚。以沙律菜、青瓜、蕃茄、紫番薯蓉配上煙三文魚，再加上軟硬適中嘅蕎麥麵，所以食落都非常爽口清新。飲品方面就芒果奶昔，入面除左有芒果、菠蘿、香蕉，檸檬同果仁之外，仲有配寒天、仙草、亞奇籽，所以入口酸酸甜甜，質地厚而順滑，加埋碎粒果仁仲增加口感添。我嘅主食就係 黑糖生薑豚肉漢堡，外層漢堡包軟熟，內層豚肉軟腍肥美得嚟個味道都調味剛剛好，再夾住蕃茄同生菜，所以食落夠晒fresh之餘口感仲好juicy，配菜仲有脆脆玉米片同埋新鮮沙律菜，整體上都可以話有驚喜。最後我就嚟杯 蜜桃小熊乳酸C，單睇個樣都係啱晒打卡，而佢個味道都唔錯，好重蜜桃香味之餘，入面仲有啲粒粒果肉，所以酸酸地幾好味夠解渴。