圓圓小姐 (山東街) (Closed)

喺旺角等先生放工，經過見到原來圓圓小姐喺度開咗分店，當然要嚟返杯久違嘅珍珠奶茶！飲品選擇非常多，花多眼亂，衝住奶茶而嚟嘅我都選擇困難症發作，皆因佢茶底都有幾款選擇。經過店員細心嘅講解，我最後揀咗招牌嘅圓圓珍珠奶茶同炭焙烏龍奶茶，店員話佢哋嘅茶葉全部都係自家調製，各有特色，帶有花香或者麥香。先生揀嘅圓圓珍珠奶茶用上阿蕯姆紅茶，帶有淡淡嘅大麥風味同蜜棗香氣，配上分別用蔗糖同黑糖煮成嘅黃金珍珠同黑糖珍珠，甜度適中，層次豐富，果然係鎮店之寶。我揀嘅炭焙烏龍奶茶茶味香濃，配上彈牙嘅芋薯圓同嫩滑嘅仙草，口感非常豐富，喜歡烏龍茶嘅話絕對唔能夠錯過！老實講見到旺角有圓圓小姐嘅分店真係好開心，佢嘅奶茶無論茶底抑或配料都完勝唔少出名嘅手搖飲品店，衷心祝福佢越做越有，最緊要係保持水準，勿忘初心！