南山冰室 (Closed)

其實食好嘢唔一定係靚餐廳， 事實上林太經常食茶記! 原因係快靚正多選擇吖嘛♡ 今日路過銅鑼灣肚餓搵食， 就去咗呢一間南山冰室， 睇餐牌原來都有幾多特色嘢食喎， 又唔係貴咪試下囉。#肉骨茶 $20最驚喜嘅係呢度叫餐可以加錢叫肉骨茶， 大大碗都幾足料㗎， 舊肉骨都好淋， 不過略嫌藥材味唔夠重。#海南雞飯 $68呢個係特別為bb而叫， 佢真係好鍾意食海南雞飯。。。 講返重點， 呢個海南雞飯雞肉嫩滑，而且真係冇骨， 呢個小朋友秒殺。配嘅一碗飯份量都好大仲有一碗湯， 都幾抵食。#四寶飯 $55聽聞呢度最好食嘅係叉燒飯， 但又因為我想食鹹蛋所以叫咗個四寶飯， 叉燒果然肉質鬆化，厚肉入味，真係唔錯，但其他燒味就未見好突出， 下次都係嗌返叉燒飯♡#龍眼冰 $24茶餐廳有龍眼冰梗係叫啦，鍾意佢唔太甜而且都幾足料♡ 另外呢度仲有紅豆冰、荔枝冰，同埋雜果賓治選擇㗎。