茶記冰室 (Closed)

茶記冰室——又茶記又冰室咁，淨係睇個名已經覺得呢間餐廳好特別。原來佢唔係得個名咁簡單。佢真係有齊茶記同冰室食到嘅野架！食物款式多籮籮，實有一款啱你食！去嘅時候啱啱開始下午茶時段。未食晏，想食d主食，見有「抵食下午茶炒粉麵」，$34奉送茶啡，咁抵喺邊度搵！叫左個乾炒牛河食。乾炒牛河好有鑊氣，醬汁比一般茶餐廳落得少，睇落色水較淡，味道淡啱唔會太鹹，啱曬我呢d著重健康嘅人士！朋友嗌左咖喱牛腩飯。咖喱牛腩飯咖喱香濃，咖喱汁較甜，唔會辣到食唔到。牛腩腍身易入口。食左咁多肉，食番d菜平衡下先。嗌左個上素羅漢齋。超足料！有芽菜、大白菜、豆腐、木耳、紅蘿蔔絲、秀珍菇等。真係多料到數唔曬呀！呢味菜只係用水灼熟加少少茨同鹽就上枱，清得黎又唔會味淡到唔想食。我同朋友不知不覺竟然清曬成碟！食完主食繼續食「甜品」！下午茶重有「冰室」類嘅野食比你揀！「輕鬆悠閒下午茶」餐牌有沙律同埋西多士、三文治等包類。我同朋友就點左炸雞髀沙律同埋咖咉西多士試下。炸雞髀沙律雞髀啱啱炸起，重熱辣辣！咬開後雞肉滴曬出黎，好juicy呀！沙律酸酸甜甜好開胃，有兩片大蕃茄舖喺面，好fresh！