財記美食 (Closed)

之前分別試過晚飯小菜同早餐，小菜係唔錯但早餐就反而麻麻(可能係唔同廚師嘅關係)，今次都係去食晚飯。分別點了西湖牛肉羮、酥炸鯪魚球同避風塘茄子。先講西湖牛肉羮，呢味餸喺茶餐廳好少見，上枱時見到我諗起碼夠七至八個人食。個羮好多芫荽，食落去好香，同埋都好多豆腐同牛肉，好足料。另外建議加落啲飯度食，好似食泡飯咁，係另一個食法，味道唔錯。至於酥炸鯪魚球，好大粒，同埋面層好脆，最緊要佢個蜆蚧醬，聞落去好香花雕酒味，而且都幾多粒蜆肉，粒鯪魚球點落去食簡直係一流。最後到避風塘茄子，炸蒜夠晒多，而且熱辣辣，個脆漿調得唔錯，食落去個皮唔厚同好脆，啲茄子又唔油，仲係軟軟哋身，外脆內軟，口感幾好。總括嚟講食咗兩次小菜，呢間真係唔錯，每次未點餸就俾碗例湯你先，而且佢啲炸嘢特別出色，值得推介。