Odelice! (海之戀商場)

Open Now

Now Closed

兩個人撐枱腳嚟到呢間位於荃灣海之戀嘅Odelice ，餐廳主打法國菜，裝修設計走型格路線以藍色為主調，另外黑白格仔地磚再加埋吊燈，露台外面仲可以見到海景，環境都好闊落舒適。枱上仲要放上小蠟燭，增添幾分浪漫氣氛~法式小館雙人套餐$788，套餐包含湯、頭盤、主菜兩款及甜品，另外加配法國生蠔仲有八五折優惠！特色主廚拼盤呢個頭盤真係分量十足，有煙三文魚、意大利風乾火腿、炸黑松露蘑菇球、三文魚醬、燒茄子同埋酸種麵包，每一款都各具特色，我就最鍾意黑松露蘑菇球，黑松露香味濃郁，外脆內軟！三文魚醬配麵包都好正～馬賽龍蝦海鮮鍋滿滿一盤嘅海鮮！有龍蝦、青口、大蜆、魷魚同埋盲曹魚，龍蝦啖啖肉仲有膏添啊，肉質爽口彈牙，貝殼類冇沙夠鮮味，蕃茄醬汁酸酸甜甜充滿海鮮味道，點麵包一流呀！香橙烤豬腩即係法式燒腩仔😛表皮卜卜脆，油脂平均又唔會過於肥膩，肉質軟淋但又有咬口，配搭香橙醬汁甜甜地好特別～醬汁仲有健康嘅羽衣甘藍同埋幼滑薯蓉。法國生蠔好新鮮，充滿海水味🌊蕃紅花啤梨蛋糕呢件蛋糕仲係熱熱地㗎，香甜得來又唔會膩，啤梨仲有少少爽口，配搭香橙果醬，口味更有層次。