爆丼丼 (Closed)

星期六晚市7點幾嚟到爆丼丼, 餐廳接近滿座, 人氣非常旺。雖然呢度最出名係丼, 但除左丼之外仲有串燒, 壽司等其他選擇, 不過見隔離檯個飯份量都唔細, 我同朋友一人點一個就夠曬啦。跟餐送麵豉湯, +$5 可轉汽水。呢個丼認真丼如其名, 成個飯滿佈三文魚籽, 爆滿程度係令你完全無從入手, 一舀落去三文魚籽馬上滿到瀉。魚籽粒粒飽滿, 食落微微偏鹹, 配白飯唔加調味料都絕對無問題。丼中仲有拖羅蓉 、帆立貝、吞拿魚、三文魚, 夠曬豐盛。安格斯肥牛油脂豐富, 融入飯中, 配上醬汁調味偏重, 但十分惹味。兩大片厚切鵝肝, 極之肥美, 入口油香四溢, 食完已經再無空間叫其他嘢啦。