香江花月 (荃灣廣場)

Open Now

Now Closed

同事大力推薦我嚟呢度打邊爐，咁啱今日去開荃灣，終於有機會試吓😍見到餐廳門口有做推廣優惠，二人套餐晚市只係288👏🏻 加一及醬料費。我哋見到呢個優惠都幾啱我哋食，所以就直接叫咗呢個套餐。套餐有兩份特選牛肉，中山脆骨腩，芝士腸，餐肉粟米餃，蟹籽墨魚丸，台式鴨血，蔬菜同埋烏冬兩個，真係好豐富🤣一坐低店員已經拎咗兩杯蘋果茶俾我哋，加咗無花果去煲好清新。另外個爐都值得一讚，係凹咗落去嘅，比較深，咁就唔使驚俾熱湯彈到周身都係😛湯底我哋叫咗麻辣湯底同埋沙嗲湯，沙嗲湯底好多花生粒粒，足料又夠香。麻辣湯底都夠晒重口味，食到咁上下我哋都要拎啲辣椒籽出嚟。雖然係套餐，但係啲食材一啲都唔馬虎，特選牛肉都有牛味，脆骨腩亦都件件都好厚切😆我最鍾意就係餐肉粟米餃同埋台式鴨血，粟米同午餐肉真係好夾，食落有啲爽口嘅粟米即刻覺得冇咁罪惡感🤭台式鴨血配上麻辣湯又係冇得輸😂超級入味！最後食埋兩個烏冬真係飽晒。呢個價錢喺商場入面食到兩個咁飽又好食😋而家真係好難搵到，性價比真係超高！重點係坐得舒服又夠冷氣🤩爽！而且呢度嘅裝修真係落足心思，啱晒打卡。下次一定會再幫襯。