大兄冰室 (Closed)

前日同老婆行開荃灣，見到開咗間新冰室個招牌好鬼搶眼，一於決定試試佢。入到去，啲裝修都好醒神同colorful，睇睇menu，主要有蕃茄螺絲粉、熱狗、漢堡包之類。夜晚成日食外賣，晏晝一於盡興啲，肥仔波叫咗個脆皮豬手蕃茄螺絲粉，原味微辣，加咗個辣肉醬熱狗，飲品就揀咗特飲，黑糖珍珠奶茶。蕃茄湯底好濃，辣度適中又唔會太搶味，仲有啲蕃茄蓉同蕃茄粒，真係可以連湯都飲晒。值得一提係脆皮豬手配嗰個醬，酸酸甜甜，好開胃，中和咗豬手個種膩，大推！老婆就揀咗西蘭花拼花枝丸，雙重芝士蕃茄湯底。啲芝士好重手，仲拉到絲，同個蕃茄底好夾。見到個menu有好多熱狗、漢堡包同潛艇款式，我地仲叫咗個熱狗開心share。食落個麵包好鬆軟，啲料好足，有辣肉醬蕃茄生菜加埋條腸，上面仲要有埋芝士，好滿足，夠晒飽。驚喜位係飲品，啲特飲好多選擇，奶蓋果茶都有，肥仔波同老婆今次就試咗黑糖珍珠奶茶同朱古力脆脆，諗住冰室整茶飲咁頂癮，點知真係有茶飲店水準。珍珠奶茶唔會因為係黑糖而過甜同埋啲珍珠有咬口，杯朱古力脆脆上面有忌廉同脆皮朱古力，老婆都相當欣賞。肥仔波指數：4/5