荔園茶餐廳 (Closed)

朋友係外國返黎兩個月，咁耐冇見，自然要約出黎聚下，咁啱最近我地嘅童年回憶-荔園開左茶餐廳，一於就去試下。入到去嘅感覺就係好温暖，天花板用左米色嘅小燈泡，好似以前掛係攤位果啲咁，再加上木馬公仔同牆上面嘅掛畫，令餐廳舒適得黎不失之前嘅味道。由於係下午茶時間，我同朋友都只係叫左小食，我叫嘅粒粒西多，好香脆，糖漿份量亦都啱啱好，最特別嘅係西多入面冇花生醬，入口冇咁膩，對女士黎講亦都冇咁guilty〜至於我朋友就叫左個招牌雞脾沙律，以前荔園最多人食就係雞脾，但宜家呢隻都好食，但已經唔同左。味道方面，雞皮炸得好脆，唔會有陣油係面，雞肉方面，冇乜雪味，亦有肉汁，十分抵食。最後仲叫左一杯有得自己落手整嘅菠蘿冰，食完上面兩樣炸野之後飲落去好舒服，新鮮菠蘿搭住雪碧亦幾好味，飲住佢黎傾計十分適合。臨走嘅時候影左張相，係荔園嘅舊地圖。見到嘅時候都幾感觸，因為唔覺唔覺荔園已經消失左二十年，我都已經唔再係細路女，而我又要唔知等幾耐先可以再見我個朋友……荔園由樂園變左茶餐廳，不過一直冇變嘅就係荔園依然係見朋友嘅好地方。