富華冰室 (葵涌廣場)

Open Now

Now Closed

同朋友兩個去開葵芳區做嘢，完咗之後都係諗住搵間茶餐廳食飯最好，所以就走咗去葵涌廣場睇吓有乜嘢好選擇，結果都係去咗富華冰室，特別係因為落雨關係，響嗰度食完飯經過商場再經過新都會廣場就完全唔使驚會濕身。其實知道富華冰室之前已經轉過兩三手唔同嘅茶餐廳，不過之前嗰啲好多都捱唔住，主要都係因為食物質素問題，跟住根本唔夠同其他食肆競爭，直到變咗富華冰室，個人覺得其實仲好過新都會廣場嘅文華冰室，性價比高啲。今次我哋都好簡單，兩個人都突然間好想食咖喱，所以分別帶咗一個咖喱牛肉飯同埋一個咖喱牛脷飯，大家都係叫凍檸茶。兩個飯咖喱汁到好夠味，同埋都好足料，牛肉係亂口嘅，牛脷亦都煎過，所以咬落去多一層香煎嘅口感，飯嘅份量亦都適中，檸檬茶就真心冇乜特別感覺。整體嚟講如果響葵芳區要去茶餐廳，好多時都會自動走咗去呢間。