中村藤吉 (Closed)

閒日放假一早就去The One排隊，10點去到𨋢大堂，已經圍起部分位置排隊，前面有5個人，大約10點半有職員落派籌，每人再派粒抹茶朱古力，即刻開來食，味道好好，好濃抹茶味！之後搭𨋢上18樓，大家依籌號排隊，等到開門再入門口按機取票，然後坐低再等叫號碼，逐個籌帶入去，時間依香港人標準係慢，但我唸學茶道文化嘅人要識慢活啩！終於等到我哋，店員安排我們坐靠窗二人枱，一排窗非常光猛，淺木傢私，最吸引係場中嘅茶道台！枱櫈唔迫！好舒服！入場前店員會由頭籌問每一位要唔要預約每日限量16份嘅蕨餅，我哋當然唔會放過呢個機會！要了一份，另外再要了份食家推介嘅京之精選！蕨餅（$88）擺盤好靚，和式餐具，6片蕨餅，沾滿抹茶粉，旁邊放咗黑糖漿同抹茶糖漿！蕨餅軟軟的，質感好似 糯米糍有韌性，淨食微甘，黑糖太甜，抹茶糖漿又太甘，我就兩樣都沾一啲，自己調製到啱自己口味啦！好好味！京之精選（$98）擺盤好靚，乜都有啲，抹茶雪榚微甘好滑，有兩款蛋榚，抹茶同黑糖，兩款都好鬆軟！不過抹茶味唔夠蕨餅強，黑糖味微甜，紅豆好甜糯，栗子較硬！紅桑子未解凍咁！酸酸地較硬！忌廉無乜味，純粹增加滑溜感！整體好味！茶錢（$20）店員提醒好熱！