LA Restaurant & Dessert Bar (Closed)

女人街臥虎藏龍，發掘到一個LA餐廳！前菜有蒜蓉包，配由帶微酸蕃茄加香草加橄欖油做成嘅醬，簡單又好味。忌廉湯足料，有蜆肉、蘑菇。小食點咗烤焗芝士蟹肉牛油果。第一次咁食牛油果，係全餐嘅驚喜之作。必食！牛油果夠熟，creamy嘅口感配埋滿滿一絲絲蟹肉係大滿足。面頭仲有最愛嘅微焗嘅芝士，沒有不愛嘅可能。主菜係烤焗芝士虎蝦墨汁意大利飯。大大隻原隻虎蝦，足足有1隻手指長。好彩有新朋友剝殼，啖啖肉，正。肉質爽口，保留到鮮味。意大利飯軟硬適中，就返港人味道。墨汁調味好，有淡淡嘅海鮮甜味。不過，食墨汁一大注意係要抹嘴！！店名有dessert bar，睇黎對自家甜品好自豪，所以決定食下LA伯爵茶奶凍焦糖脆脆伴雪糕。伯爵茶味好出。焦糖脆脆配雲呢拿雪糕，底下oreo碎，係唔會出錯嘅組合。焦糖脆脆唔會過分甜。新朋友對甜品大讚。飲品各點咗mocktail LA Mojito同芒果沙冰。呢排對有薄荷嘅飲品情有獨鍾，幾鐘意清新解渴嘅感覺。Weekend係旺角鬧市中享受一餐輕輕鬆鬆嘅西餐好正，希望下次黎食威靈頓牛柳。