Video
Read full review
2010-09-28
141 views
我之前經過中環機利文新街，見到呢間懷舊茶餐廳，對我哋後輩嚟講，反而有一份新鮮感；原來呢度就係蛇竇！我分開兩個星期六嚟幫襯。第一次：(下午茶) 蛋撻 + 熱好立克 $17.5第二次：(午餐) 腿蛋治 + 菠蘿包 + 熱杏仁霜 $28.5蛋撻：$4.5不論堂食抑或外賣呢度都係同價，出面有茶餐廳堂食貴 $1~ $2。蛋撻烘焗得恰到好處，撻邊及撻底無焗燶！牛油撻皮有牛油香味，撻身夠薄；一咬開，見到中間蛋漿份量不少，有蛋香、夠滑，亦無小氣孔！甜味適中，食起嚟好鬆化。我始終覺得牛油蛋撻係好食過酥皮蛋撻！因為酥皮蛋撻要做得好，先要條件係酥皮夠多層兼要鬆化！唔係度度食到令人滿意嘅酥皮蛋撻。熱好立克 ：$13儘管天氣有幾熱以及時間有幾趕，我依然堅持飲熱飲！因為可以飲出淡奶嘅真正濃度，唔會受冰而影響。凍飲嘅冰會破壞質感，變得水汪汪！以肥肥矮矮嘅杯盛住，慢慢品嚐箇中味道，奶落得夠多，水夠熱，夠帶出好立克特有香味！凍好立克未必感受得到！腿蛋治 ：$12我發覺呢度每枱食客都會叫蛋類有關嘅食物，例如：滑蛋蝦仁飯、滑蛋叉燒飯、滑蛋牛肉飯、蛋治。蛋治 $11，腿蛋治 $12，唔爭在俾多 $1 食埋火腿。 我見同枱女食
我分開兩個星期六嚟幫襯。
第一次：(下午茶) 蛋撻 + 熱好立克 $17.5
第二次：(午餐) 腿蛋治 + 菠蘿包 + 熱杏仁霜 $28.5
蛋撻：$4.5
不論堂食抑或外賣呢度都係同價，出面有茶餐廳堂食貴 $1~ $2。蛋撻烘焗得恰到好處，撻邊及撻底無焗燶！牛油撻皮有牛油香味，撻身夠薄；一咬開，見到中間蛋漿份量不少，有蛋香、夠滑，亦無小氣孔！甜味適中，食起嚟好鬆化。我始終覺得牛油蛋撻係好食過酥皮蛋撻！因為酥皮蛋撻要做得好，先要條件係酥皮夠多層兼要鬆化！唔係度度食到令人滿意嘅酥皮蛋撻。
熱好立克 ：$13
儘管天氣有幾熱以及時間有幾趕，我依然堅持飲熱飲！因為可以飲出淡奶嘅真正濃度，唔會受冰而影響。凍飲嘅冰會破壞質感，變得水汪汪！以肥肥矮矮嘅杯盛住，慢慢品嚐箇中味道，奶落得夠多，水夠熱，夠帶出好立克特有香味！凍好立克未必感受得到！
腿蛋治 ：$12
我發覺呢度每枱食客都會叫蛋類有關嘅食物，例如：滑蛋蝦仁飯、滑蛋叉燒飯、滑蛋牛肉飯、蛋治。蛋治 $11，腿蛋治 $12，唔爭在俾多 $1 食埋火腿。
我見同枱女食客叫咗蛋治，起碼成 1cm 厚嘅滑蛋，睇到我都心郁！先講方包，雖然只係普通方包，勝在夠軟熟，夾蛋果一面搽咗牛油，蛋係滑蛋，但唔算多，亦唔覺油，又有蛋香；當然不及澳洲牛奶公司咁正啦！牛油嘅咸味配合淡味雞蛋，確實好夾！至於火腿，喺出面有啲茶餐廳嘅火腿凍冰冰，照放落三文治入面。呢度嘅火腿係熱嘅，應該係淼過水，表面無油漬亦無煎過嘅痕跡。雖然加咗 $1 多塊火腿，但係蛋嘅份量少咗起碼一半！
菠蘿包 ：$3.5
呢個菠蘿包真係好抵食！面頭嘅菠蘿脆皮明顯比其他西餅店嘅更厚！給予我一份驚喜，就係未食已經嗅到一陣清甜菠蘿香味！成個菠蘿包無落到菠蘿片，相信脆皮部分加咗菠蘿汁。食落去都有菠蘿味，新鮮出爐不久，仲係暖暖地，但略嫌唔夠熱；包質密度高，食起嚟仍然軟熟，外脆內軟，無可厚非令人回味！值得推介！
熱杏仁霜：$13
同以肥肥矮矮嘅杯盛住，我飲熱杏仁霜通常落一茶匙糖，呢度係用糖罌，棄用糖包，雖然環保，但易受潮！我見罌入面有些糖凝結成一大粒。攪勻一飲，先係聞唔到杏仁味，跟住飲唔出杏仁味，飲到底才有些少杏仁味，怕且只係落得一茶匙，難怪好似飲緊奶水！ 如果落夠兩殼，杏仁味更香更濃又夠滑！
我喺度食嘢一陣間，聽到有趣嘅暗語：
熱好立克 - 「好力」
菠蘿油 - 「加油」
幾有鼓勵作用呀！大家做嘢都會落力啲啦！
Post
