OPPA Coffee Bar Restaurant

Open Now

Now Closed

行過尖沙咀想食韓國野，見到有一間有幾個人排隊，見到出面啲menu有超級邪惡既火山熔岩炒飯，即刻口水都流埋，排左十幾分鐘就入得。同朋友二個人叫左個雞肉蛋漿熔岩炒飯，韓式炸粉絲同蜜糖牛油炸雞。叫完無耐，個雞肉蛋漿熔岩炒飯已經黎到。我認為呢個熔岩炒飯係必點之選，芝士既份量大約有一個拳頭咁多，加埋蛋漿，由韓國侍應生用火槍即場係你面前燒，又可以打卡又好食。炒飯幾有口感，雖然唔多食得出雞肉，但係芝士配合蛋漿既味道實在太香濃，好"芝"味，芝士拉哂絲咁，一定要試。之後就有韓式炒粉絲。啲粉絲酸酸地咁，又好彈牙，令人愈食愈想食，非常開胃。而且粉絲同佢啲調味料味道好夾，值得試下。最後上蜜糖牛油炸雞，份量都幾多，味道比較甜，可能岩女仔食多d，有好多蜜糖係炸雞同薯條上面，配埋牛油味係唔錯既，個皮都炸得脆，有d薯條就比蜜糖整淋左。整體黎講係高質既韓國食店，不過地方唔算大，位置都唔算多，下次食要book定位。埋單個時會有粒糖比你都幾好。