正品小館 (Closed)

今日落大雨，全日個天都黑掹掹，最好嘅節目梗係雀局。朋友住喺佐敦，到咗之後佢落樓下一間小菜館同我醫肚先，佢話周不時都食呢間，抵食又好食喎。菜館唔算大，光線充足加線白色簇新嘅水泥牆，感覺光鮮乾淨，坐得舒服。睇睇餐牌同牆上黑板嘅每日飯餐同特價海鮮小炒，全部都好街坊價，難怪落緊大雨都好多街坊嚟幫襯。【杏汁花膠湯$48】、【杏汁白肺湯$38】呢度嘅杏汁湯係糊狀咁比較濃稠，杏仁味香濃。花膠同豬肺都唔少，養顏又潤肺。【凍蟹$68】隻蟹望落唔算大隻但食落先知原來佢好好「肉地」。蟹肉雪白鮮爽，凍蟹好處係唔怕鮮味因熱力蒸發，啖啖肉啖啖鮮蟹味，好正呀，啱晒我嗜蟹之人。【黃金大蝦$88】蝦都算大隻，一路”lun”殻一路食到外面滿滿咸蛋味，好味到食完連手指都吮埋。【豉椒炒蜆$58】有紅椒、青椒同洋蔥炒，大大粒嘅蜆肉食得出係新鮮，味道微辣非常惹味。【招牌海南雞飯連湯$38】$38有雞南雞飯食仲有埋例湯?! 真係難以想像，我哋轉雞脾+$5，雞肉更加鮮嫩，仲有大大碗雞油飯，夠飽了。除咗嘢食抵，飲品都抵㗎，惠顧食品加$2有熱飲，凍飲就加$4，我哋叫咗一杯熱咖啡一罐汽水加埋先$6，抵過去超巿買。