富來粥麵小廚

Open Now

Now Closed

見小肥近日多咗出入跑馬地，發掘咗幾間新店，似有六尺高嘅高姐姐就推介區內屹立咗十幾年嘅「富來粥麵小廚」，大讚小菜經濟得黎有水準，肥肥家族襯週末有空即舉家一試。昇平街斜坡上兩邊都係咪錶位，不過全日都泊滿車車。位於街頂嘅地舖綠色嘅招牌好易認，不難找到。小店外牆貼出該星期嘅抗疫優惠及時日精選。室內空氣流通。牆上掛出嘅靚靚素描均為跑馬地嘅街景，街坊情懷盡在不言中。散座空間感足，除咗有電視睇，投影機會不斷循環時播放出時令推介菜式。電子自助落單簡便衛生。不過場內嘅熟客似乎都係鍾意真人對話多。桌上擺有自用餐具及任用紙巾。濃湯雞煲翅（$498/份）：翅翅同雞湯好有文化地分開上，並由店主菲臘哥哥親自分配。如相所示，每份當真足八兩翅翅，四人分享剛剛好，不過五、六個人分都冇問題。以砂鍋上嘅濃湯雞熱辣辣、香噴噴，飲落香濃甜美，火喉十足，必先預訂絕對有理！每人有成兩大碗湯飲，煲湯嘅半隻雞肉相當軟腍，$498實屬抵吃足料之選。拔絲菠蘿咕嚕肉（$118）：酸甜開胃嘅咕嚕肉嘅拔絲外皮香脆，肉質亦好鬆爽。秘製鹹香雞（$128/半隻）：鎮店菜式之一嘅鹹香雞甘香幼滑，雞皮柔潤入味。富來小炒皇（$128）：招牌小炒皇爽脆惹味，