龍門大酒樓 (Closed)

同班波友打完波搵地方食飯，一行六人原本諗住去明記，誰不知內部裝修暫停營業，去莊士敦又鬼咁多人，輾轉下到了這裡。呢度十年如一日裝修都係咁舊，地方係差少少，但在灣仔打墩咁多年，話到尾都係陪伴我們成長的地方，而且價錢相宜，所以都無所謂。叫了一煲例湯、羊腩煲、焗魚腸、芋頭扣肉、大豆芽炒大腸同栗子炆雞。今晚例湯是粉葛赤小豆煲鯪魚，夠聚火，足料亦好似都少落味精，份量足夠一人飲到兩碗，都唔錯；羊腩煲的羊肉不是什麼好貨色，味道唔燥，肉仲有D嚡同韌，同吃的配菜如馬蹄、生菜、枝竹等更好吃；焗魚腸焗得幾香，無咩腥味，食鬼魚腸的可一試；芋頭扣肉幾肥美，如喜歡吃肥肉的話絕對會很滿足，不吃肥的都可以食芋頭，夠粉亦很甜美；炒大腸風味不錯，可惜大腸幾韌，可能不是新鮮貨都唔定；栗子炆雞亦好味，又係栗子好食過雞。連啤酒汽水，埋單連加一貼士四百蚊有找，一人只係六十幾。雖然地方麻麻，食物味道亦非很出色，但勝在經濟抵食。題外話：酒樓門口有安排員工拿咪招徠，個人覺得是多止一舉，加上個阿姐可能由朝講到晚有D攰，所以比較有神無氣，老實講有點反效果。