美心Food2 (Closed)

搭夜機返老家，因午餐食齋關係，七點已飢腸轆轆，J一到機場，小妹急不及待捉埋佢去搵食。最後，見美心無咩人排隊，就買左碗即叫即煮的雲吞麵醫肚。一碗雲吞麵$34，並不便宜，但理解位置偏僻，租金昂貴所致也。撥開d幼麵，細心一數，有6粒嬌小玲瓏的雲吞，再加上份量適中的麵條，可以接受也。一箸麵放入口，幼身銀絲全蛋麵爽口有嚼勁，不會過硬或過淋，可見烹調時間控制得宜。雲吞不大不小，盈盈一吞，惜徒有蝦肉而豬肉欠奉，幸雲吞皮薄，蝦肉餡也見鮮爽。搯一小匙湯喝下，湯底不太鹹，夠鮮甜濃香，味道不錯﹗連鎖快餐店一向粗製濫造，毫無誠意。因此，小妹未食前已不抱任何期望，誰知，味道及質素竟是意料之外，確有驚奇﹗