心甜 (Closed)

向來我都好少食甜品(怕肥，哈),搬左黎大圍幾個月，知就知好多甜品鋪，但好少光顧，因為覺得無咩吸引，晚晚屋企食完飯落街散步行到呢間心甜門口，總會見到有位哥哥仔好鬼熱情好鬼好笑容去招呼啲客，呢個年頭，好少飲食業咁積極架喇，唔黑面當俾面你。終於今日，我忍唔住入去八下有咩好食，周圍都係糖水鋪，呢間總坐滿，總有原因既。門口果位哥哥仔好好招呼，佢介紹左班蘭窩夫我試，個窩夫好香，夠熱夠新鮮，雖然耐少少，總算即製嘛。驚喜來了，原來佢地個雪糕係Mövenpick，呢個係我最鐘意食既牌子，自從之前係酒店自助餐食過之後就未食得返，原來屋企附近就有得食，以後要多啲黎先得，食完忍唔住追加左一球添。走既時候再打包俾左個椰王凍俾呀媽，返到去呀媽大讚好香椰香味，又唔會過甜，丫，叫佢留淡俾我食佢自己食晒，唯有聽晚再買過啦。