裕鵝莊 (Closed)

燒鵝係我至愛嘅燒味，當一知道＂裕鵝莊＂係深井裕記第三代傳人開，開心到即刻拉兩個朋友一齊去試，順便聯誼一下，話晒响市區，唔駛山長水遠入深井食......當晚一坐低我就即刻預留一份限量供應嘅下莊，個個都推介，等我都試下有幾正先。🍴深井燒鵝(下庒) $190💎期望越大失望越大，呢個下庒啲肥膏肥得驚人，差唔多每件都係膏多過肉，睇相已經見到爆膏情況，而且鵝上枱唔熱、肉唔多汁入味、皮又唔夠脆，完全同我响深井裕記食係兩回事！🍴滷水鵝肝配意大利黑醋 $68💎💎💎呢個價錢竟然可以食到鵝肝，仲要有成8件咁抵，鵝肝滷得非常入味，口感實在食到鵝香，我覺得唔蘸黑醋好味啲🍴炸大腸(伴青檸汁) $78💎💎💎💎炸大腸唔係周圍都有得食，而呢碟炸大腸有齊兩種口感，一種無膏，另一種有膏但唔會好肥，同樣香脆可口但唔會覺得有油膩感，齋食同蘸汁同樣好味🍴蒜蓉蝦乾蒸翠玉瓜 $85💎💎💎💎翠玉瓜切片非常方便食，又非常吸汁，大量蒜蓉灒油後超惹味，加埋份量唔少嘅蝦乾，無唔食嘅理由三人共消費：$480 (Openrice訂位部份食品有8折)