ALO ALO Vietnamese’s Cafe (Closed)

之前見朋友介紹過呢間係上環嘅樓上越南菜，望到維港海景之餘，入邊嘅裝修亦都非常之少女風，有一大幅花花打卡牆，仲有一啲越南嘅裝飾物可以影吓相。今日就同朋友上咗嚟呢度食過午餐。呢度主打係北越嘅菜式，口味唔似南越咁落咁多香料，味道偏向自然，越南粉呢類菜式，通常用清湯處理。店名Alo Alo原來係越南嘅Hello Hello嘅意思。環境果然係朋友介紹咁樣，打卡一流呀。另外值得一讚嘅係，呢度有酒精可以消毒雙手，夠晒衛生。我哋今日就點左一款老ME招牌蟹肉檬粉（$88），同埋一款牛坑腩雞絲Pho($88)，小食揀香炸蔞葉肉卷（$48）。我呢碗蟹肉檬粉，蟹肉同一啲肉碎一齊，就喺面頭自己攪開，食落都幾有蟹肉味。個湯嘅味道幾清，而且感覺自然，原來係因為呢度唔落任何味精或者添加劑。朋友嘅牛坑腩雞絲河粉，朋友都大贊正呀，唔使幾分鐘就秒速清曬湯都飲埋。我哋嘅小食，出面係用一啲平時少見嘅可食用葉包住，入面係一啲肉碎，所以都幾飽肚，雖然係炸物，但係都唔算油膩。午市本身跟熱檸水或者熱柚子蜜，我哋就叫咗杯熱柚子蜜，另外加$20就試吓呢度嘅滴滴咖啡。越南嘅滴漏咖啡唔係落奶，而係落煉奶，咖啡嘅味道都幾香濃，飲完精神為之一振。